გალერეა: 24 ახალი სიტყვა Urban Dictionary-სგან

ავტორი: გიორგი ნაკაშიძე

სრულად

Critical Mass Tbilisi. 26.02.2015

Critical Mass გახლავთ ველოსიპედის მოყვარულების მიერ შექმნილი ღონისძიება, რომელიც იმართება ყოველი თვის ბოლო პარასკევს. ივენთის ისტორია იწყება 1992 წლიდან, როდესაც ქალაქ სან ფრანცისკოში პირველად მოეწყო ეს ღონისძიება. მას შემდეგ სამასზე მეტმა ქალაქმა მიბაძა სან ფრანცისკოს. 

Critical Mass უბრალოდ გართობისთვის შეკრება და ველოსიპედებით ქალაქში მოძრაობა როდი გახლავთ. ჩემი აზრით, მან უკვე შეიძინა სოციალური მოძრაობის, ერთგვარი პროტესტის ფორმა, როდესაც ველომოყვარულები ღია აცხადებენ და გამოხატავენ თავიანთ დამოკიდებულებას, რომ ქუჩებზე ერთპიროვნული მფლობელობის უფლება მხოლოდ მანქანებს არ ეკუთვნით! 

ამ დღეებში დაანონსებულია კიდევ ერთი მსვლელობა. 26 ივნისს ველომოყვარულები 20:00 საათზე იკრიბებიან ვაკის პარკის მთავარ შესასვლელთან, საიდანაც მსვლელობა აიღებს გეზს. როგორც ფეისბუქის ივენთის აღწერაში წერია, მსვლელობას სიმბოლური ხასიათი ექნება და იგი მიეძღვნება 13 ივნისის კატასტროფის შედეგად დაღუპული ადამიანების ხსოვნას:

,, ივნისის თვის ბოლო პარასკევს გაიმართება პერმანენტული მსვლელობა Critical Mass. მსვლელობით ველომოყვარულები პატივს მიაგებენ 13 ივნისს მომხდარი კატასტროფის შედეგად გარდაცვლილ ადამიანთა ხსოვნას და საერთო თანადგომას გამოხატავენ მოქალაქეების მიმართ, რომლებიც ტრაგედიის დღიდან დაუღალავად შრომობდნენ, თავიანთი ჯანმრთელობის და სიცოცხლის რისკის ფასად. გმირთა მოედნიდან დაღუპულთა ხსოვნისთვის გავუშვებთ მანათობლებს.“

ასე რომ, ყველას მოგიწოდებთ მიიღოთ ამ ღონისძებაში მონაწილეობა, იქნება ეს ველოსიპედი, როლიკები, სკეიტ ბორდი და ნებისმიერი მსგავსი გადაადგილების საშუალებას.

"ჩვენ არ ვბლოკავთ მოძრაობას, ჩვენ ვართ მოძრაობა"

სრულად

10 საინტერესო ფაქტი რეი ბრედბერის შესახებ

1. თინეიჯერების უმრავლესობის პირველი სამუშაო მაღაზიებში ბოსტნეულის დახარისხება ან ბურგერების დაჭრა გახლავთ. ბრედბერი კი 14 წლის ასაკში ჯორჯ ბარნსის სატელევიზიოი შოუში სცენარისტად მუშაობდა. ,,ქუჩაში მოვსეირნობდი," - იხსენებს ბრედბერი ,,როდესაც თეატრის წინ ჯორჯ ბარნსი დავინახე. მივედი და ვუთხარი: ბატონო ბარნს, დღეს გადაცემა გაქვთ, არა? მან მიპასუხა: დიახ. მე კი მივუგე: მაყურებლები არ გყვათ, ხომ არ მომცემდით ნებას თქვენი მაყურებელი ვიყო? ჯორჯი დამთანხმდა და პირველ რიგებში გამომინახა ადგილი. როდესაც ფარდა აიწია, მე უკვე სატელევიზიო შოუში გახლდით. ყოველ ოთხშაბათობით დავდიოდი, შემდგომ კი სცენარების წერა დავიწყე და ჯორჯს გავაცანი. მხოლოდ ერთადერთი სცენარი გამოიყენეს, მაგრამ მთავარია - ხომ გამოიყენეს!“

2. 22 წლის ასაკში რეიმ პირველად მოიკრიბა ძალა და გოგო პაემანზე დაპატიჟა. გოგონა სახელად მეგი წიგნის მაღაზიაში მომსახურე პერსონალად მუშაობდა. თავიდან მას რეი წიგნის ქურდი ეგონა მისი გრძელი ქურთუკის გამო. შემდეგ კი ყავაზე შეხვდნენ ერთმანეთს, რასაც კოქტეილები მოჰყვა, შემდეგ ვახშამი, რომელიც ქორწინებაში, 56 წლის ქორწინების წლისთავში და 4 შვილში გადაიზარდა. მეგი ერთდაერთი გოგო იყო, რომელსაც ბრედბერი პაემანზე შეხვედრია.

3. ბრედბერის არათუ მართვის მოწმობა არ ჰქონდა, არამედ საერთოდ არ ენდობოდა მანქანებს. მისი ამ ფობიის მიზეზი გახლდა უბედური შემთხვევა, რომელსაც ის 16 წლის ასაკში შეესწრო. 1996 წელს ჟურნალ ,,ფლეიბოისთან“ ინტერვიუში მან თქვა: ,,შევესწარი ექვსი ადამიანის სიკვდილის საშინელ ავტოკატასტროფაში. თვეები დამჭირდა ამ სტრესიდან რომ გამოვსულიყავი. ამიტომაც არ ვატარებ. მაგრამ, ვატარებ თუ არა, ამას მნიშვნელობა არ აქვს. ავტომანქანა ყველაზე საშიში იარაღია ჩვენს საზოგადოებაში - მანქანა უფრო მეტ ადამიანის კლავს, ვიდრე - ომები“

4. ბრედბერის ეზიზღებოდა კომპიუტერები. ,,ბილ გეითსი და მისი პარტნიორები უბრალოდ გვატყუებენ, ამბობს ბრედბერი ,,ფლეიბოისთან“ ინტერვიუში, შეხედეთ ვინდოუს 95-ს, ძალიან სულელურია. ის ასევე აცხადებდა, რომ მისთვის კომპიუტერი მხოლოდ საბეჭდი მანქანა იყო. ინტერნეტს კი ძველმოდურს უწოდებდა: ,,ხალხი კითხვას გისვამს, შენ კი პასუხს უბრუნებ. ეს 30 წლის უკანაც არსებობდა. იგივეს გაკეთება ხომ ტელეფონითაც შეიძლება. რატომ ვართ გაოცებულები ისეთი რამით, რაც უწინაც გვქონდა?"

5. 1947 წელს ჟურნალ ,,Mademoiselle”-ს რედაქტორმა რეის მოკლე მოთხრობა ,,Homecoming" წაიკითხა. ეს მოთხრობა ერთი ბიჭის ისტორიას გვიყვება, რომელიც ერთდერთი ადამიანია ზებუნებრივი არსებების ოჯახში. რედაქტორს მოეწონა და ჟურნალშიც დაბეჭდა. იმავე წელს ამ ნოველამ საუკეთესო მოთხრობის ჯილდოც კი აიღო. და გაინტერესებთ ვინ იყო ეს ახალგაზრდა რედაქტორი? არც მეტი არც ნაკლები - ტრუმენ კეპოუტი.

6. ცნობილი ნოველის ,,ფარენჰეიტ 451“-ის დაწერას რეიმ მხოლოდ ცხრა დღე მოანდომა. წიგნის სახელი კი უკავშირდება ფურცლის წვის ტემპერატურას, რომელზედაც ფურცელი იწვის ცეცხლის დახმარების გარეშე.

7. ბრედბერის თანამედროვე სკოლები დიდად არ ხიბლავდა. ,,მე ბიბლიოთეკების უფრო მჯერა, რადგანაც დღეს სტუდნეტებს ფული არ აქვთ. სკოლა დიდი კრიზისის დროს დავამთავრე. უფულოდ ვიყავი, ამიტომაც კვირაში სამჯერ, ათი წლის განმავლობაში , ბიბლიოთეკაში დავდიოდი.

8. უოლტ დისნეი და ბრედბერი კარგი მეგობრები იყვნენ. რეი დისნეის პარკების დიდი გულშემატკივარი გახლდათ: ,,მსოფლიოს ყველა კუთხიდან მოვლენ ამ შესასვლელთან. რატომ? იმიტომ, რომ ხალხს სურს იხილოს მომავლის სამყარო, უნდათ გაიგონ, როგორ გახდეს ადამიანი უკეთესი. დისნეი ცდილობს დაანახოს კაცობრიობას, რომ არსებობს ალტერნატიული გზები, რომლებიც ყველას ბედნიერს გახდის.“

9. მან ერთხელ განაცხადა, რომ როცა მოკვდებოდა, სურდა მისი ფერფლი კეტჩუპის ქილაში მოეთავსებინათ და მარსზე დაემარხათ. მოგვიანებით აზრი შეიცვალა და ისეთი ადგილი შეარჩია, სადაც ფანები პატივის მიგებას შეძლებდნენ. შემდგომ იფიქრა, რომ თავად გააკეთება საფლავის ქვის დიზაინს, სადაც მისი წიგნების სათაურები იქნებოდა დატანილი, საბოლოო წარწერა კი შემდეგი შინაარსის იქნებოდა: ,,აქ განისვენეთ, ბაბუაწვერებო“ (Place dandelions here) - ცნობილი ნოველის ,,ბაბუაწვერას ღვინოს“ საპატივცემულოდ. ან, უბრალოდ. მარტივად ეწერებოდა: ,,ფარენჰეიტ 451-ის ავტორი“. მოკლედ, ლოს ანჯელესში თუ მოხვდებით, ვესტვუდის პარკშია დაკრძალული ეს კაცი და ბაბუაწვერების წაღება არ დაგავიწყდეთ.

10. ალბათ, ყველაზე მნიშნელოვანი მოვლენა, რაც მისი გარდაცვალების შემდგომ მოხდა , გახლავთ ის, რომ როდესაც ნასას მარსის მისია (Mars Curiosity) წარმატებულად დაეშვა პლანეტაზე, იმ მიდამოს ,,ბრედბერის დაფრენა“ (,,Bradbury Landing”) უწოდეს.

სრულად

უცხოპლანეტელები

მეცნიერების ყველაზე დიდი საიდუმლოა, არსებობს თუ არა სიცოცხლე დედამიწის გარეთ. ბევრი მეცნიერი ფიქრობს, რომ დედამიწაზე არსებული სიცოცხლე უნიკალურია მთელ სამყაროში, მაგრამ ბევრ მათგანს ალბათ არანაირი არგუმენტი არ აქვს, რადგან მთელი სამყაროს დათვალიერებას რამდენიმე მილიარდი წელი დასჭირდება, რაც ამ მეცნიერებს აშკარად არ ექნებოდათ. ასე რომ ვფიქრობ, ამ უზარმაზარ სამყაროში არსებობს მინიმუმ ერთი ცოცხალი ნაწილაკი დედამიწის გარეთ.

ხშირად გავყურებ ბნელ და უსასრულო ზეცას, სადაც უამრავ მანათობელ წერტილს ვხედავ და ვფიქრობ, იქაც არის ვინმე ჩემი მსგავსი, რომელიც იმავე წამს ცას აკვირდება და იგივეზე ფიქრობს? კი, მაგრამ ვინ არის იქ? იქნებ იქაც არის წყალი? ჰაერი? იქაც არიან ჩვენი მსგავსი ადამიანები? ჯუჯა და გიგანტი უცხოპლანეტელები? მფრინავი თეფშები? ამ სფეროს მეცნიერების ცალკე დარგი შეისწავლის და მას ასტრობიოლოგია ეწოდება. ნასა-ში ასტრობიოლოგია, შეიძლება ითქვას, ერთ-ერთი მოდური პროფესიაა და დღესდღეობით უამრავი ასტრობიოლოგი იკვლევს უცხოპლანეტელებს.

მე გამიჩნდა იმედი, რომ ოდესმე ვიპოვით და შევხვდებით უცხოპლანეტელებს, რადგან უკვე შევძელით დედამიწიდან გასვლა. ოპტიმისტურად ვარ განწყობილი და მჯერა, რომ უფრო შორსაც წავალთ. მაგრამ ზოგმა ასტრობიოლოგებმა გამოთქვა მოსაზრება, რომ უცხოები ჩვენ შორის არიან. შესაძლოა ისინი იყვნენ "ჩასახლებულნი" ექსტრასენსებში და ნათელმხილველებში, რაც მათ განსაკუთრებულ ნიჭს აძლევს. ეს მოსაზრება ჩემთვის ნაკლებად მისაღებია, მაგრამ თქვენ გადაწყვიტეთ.

ერთ-ერთი მტკიცებულება უცხოპლანეტელების არსებობისა არის დედამიწაზე სიცოცხლის წარმოშობა. სიცოცხლე თავისით არ გაჩენილა. ფუნდამენტური ნაწილაკები, რომელმაც სიცოცხლე წარმოშვა, ასტეროიდებმა მოიტანეს. სავარაუდოდ, დიდი აფეთქებისას მთელ სამყაროში ასტეროიდები ცვიოდნენ. ასე დაისეტყვა ჩვენი დედამიწაც და სხვა უამრავი პლანეტაც. იმ ადგილებში, სადაც ბუნებრივი პირობები მისაღები აღმოჩნდა, სიცოცხლე წარმოიშვა, როგორც დედამიწაზე.

ასტრობიოლოგებმა დაიწყეს უცხოების ფორმაზე და ზომაზე მუშაობა. ამ ყველაფერზე დიდ გავლენას ახდენს გრავიტაცია. ძლიერი გრავიტაცია უცხოებს სავარაუდოდ ძლიერ დააპატარავებს და მათ უფრო მსუქნებს გახდის. მცირე გრავიტაცია კი მათ ნორმალურზე მაღლებს და სუსტებს გახდის (სავარაუდოდ, ისინი ცნობილ ფილმის "ავატარის" გმირებს - ნავის ხალხს დაემსგავსებიან), მაგრამ ჯერ სჯობს უმარტივესი მიკრობები ვიპოვოთ, შემდეგ - განვითარებული ჰუმანოიდები, ან მსგავსნი.

მეცნიერებმა ბევრჯერ სცადეს კონტაქტზე გასვლა, მაგრამ უშედეგოდ. ამის შემდეგ კი დაიწყეს უცხოების ძებნა კოსმოსის მოსმენით. დღეს უკვე აშენებულია დიდი რადიობაზები, რომლებიც კოსმოსს უსმენენ. სამწუხაროა, მაგრამ სიგნალები ძლიერაა დაბინძურებული კოსმოსური ხმაურით (კვანტური პუნქტუაციებით). ერთხელ მოვახერხეთ, რომ მიგვეღო სიგნალი. სიგნალი გაიშიფრა და იმ ერთი გაშიფრული სიტყვის გამო მას WOW სიგნალი ეწოდა. ამის შემდეგ კი კოსმოსში დიდებულმა სიჩუმემ დაისადგურა.

იმედია მალე შევხვდები უცხოპლანეტელს და აუცილებლად მოგიყვებით!


ავტორი: ლორდი კობიტი

სრულად

აქცია „ჩემი ქალაქი“, ანუ ქართული რეპი არ მომკვდარა

„პროექტის მიზანია, ნაჩვენები იყოს „დედა-ქალაქის“ ის მეორე, პირქუში და დაბინძურებული მხარე, რომელ რეალობაშიც თითოეული ჩვენგანი ვცხოვრობთ და ყოველდღიურად ვეჩეხებით“ - ამბობს აღნიშნული პროექტის შესახებ  facebook გვერდი. 

პროექტის იდეაა, რომ რეპის საშუალებით, შეულამაზებლად გამოხატონ ქალაქში არსებული სიტუაცია. ეს არის საკმაოდ თამამად, თუმცა სასიამოვნოდ, გამოხატული სათქმელი. ერთგვარი კრიტიკული მანიფესტი, რომელიც მიმართულია საზოგადოებისკენ და ცდილობს რეჩიტატივების საშუალებით ასახონ რეალობა. არის ცენზურიანი ტექსტები, თუმცა რეპისთვის ასეთი ლექსიკა განუყოფელი ნაწილია.

პროექტში მონაწილეობას იღებენ: Qseli 56, Ol’ Boy, Letro, Young Mic, Kmc, Baza, BonNie, Fio, Mc Friend’, Chester, K'A, Landi & Tozi, Fula, თერიკა, დივერსანტები.

ვიდეოები იუთუბის ჩენელზე - Hip Hop Movement უკვე 1 აპრილიდან თითქმის ყოველ მეორე დღეს იდებოდა (პირველი ორი ვიდეო პირადი ფავორიტია). 

ავტორი: გიორგი ნაკაშიძე

სრულად

ჯორჯ მარტინის წერილი სტენ ლის (1960-იანი წლები)

1960-იან წლებში, დიდი ხნით ადრე, ჯორჯ მარტინი, სანამ XXI საუკუნის შედევრს „ცეცხლისა და ყინულის სიმღერას“ (Game of Thrones) დაწერდა, ერთი ჩვეულებრივი სათვალეებიანი და წვერებიანი ნერდი იყო, რომელიც კვირიდან კვირამდე კომიქსების კითხვით იყო დაკავებული და ამ სფეროში იმდენად გაცნობიერდა, რომ თვით დიდ სტენ ლის წერილი მისწერა და რამდენიმე რჩევა მისცა. გთავაზობთ ამ წერილის თარგმანს:

„ძვირფასო სტენი და დორი,

მას შემდეგ რაც მივიღე და წავიკითხე „ფანტასტიკური ოთხეულის“ 32-ე და „შურისმაძიებლების“ მე-9 ნომერი, საბოლოოდ გადავწყვიტე, რომ ორივე მათგანი ბრინჯაოში ჩამოვასხა და ჩემი ოთახის შუაგულში პედესტალზე დავდგა. მიუხედავად იმისა, რომ „ფანტასტიკური ოთხეული“ „მსოფლიოს საუკეთესო კომიქსის ჟურნალია“, ამ ეტაპზე უნდა ვაღიარო, რომ „შურისმაძიებლები“ ოდნავ უფრო კარგი იყო. ეს არ ნიშნავს, რომ „ფანტასტიკური ოთხეული“ თავის სიმაღლეზე არ დგას, თუმცა „შურისმაძიებლები“, ასე ვთქვათ, უფრო სუნთქვისშემკვრელი იყო. ძალიან მაგარი ამბავი. სიტყვები არ მყოფნის. სწრაფმა ექშენმა, ძლიერმა პერსონაჟებმა და საშინელმა ფინალმა კიდევ მეტი ემოცია შემატა და კომიქსი უფრო მაღალ კლასში აიყვანა.  სტენ, შე ძველო, შეგიძლია თქვა, რომ შენმა კალამმა კიდევ ერთი შედევრი შექმნა. და ეს არტი! ყოველთვის მომწონდა დონ ჰეკის ნამუშევარი, მაგრამ ამ შემთხვევაში მან საკუთარ თავსაც კი აჯობა. 

სტენ ლი, ამერიკელი კომიქსების ავტორი,
Marvel-ის ყოფილი პრეზიდენტი

ჰეკის და აიერსის გუნდი „შურისმაძიებლების“ მუდმივ არტისტებად უნდა აქციო. დამატებითი კომენტარი რამდენიმე საკითხზე - შენ გვეკითხები, თუ რომელი ვილანები დააბრუნო. ჰო და მე ვფიქრობ, რომ პერსონაჟები, რომლებიც ღირსნი არიან გახდნენ „ფანტასტიკური ოთხეულის“ მუდმივი ვილანები, არიან Namor, Doc Doom, Hulk და Red Ghost. დანარჩენები, როგორიცაა Hate Monger და Molecule Man, ძალიან მაგრები იყვნენ, როცა პირველად გამოჩნდნენ, თუმცა მათი დაბრუნება არ ღირს, რადგან გააფუჭებენ პირველი ამბის შთაბეჭდილებებს. სხვებმა, როგორებიცაა Thinker, Puppet Master, Moleman და Diablo, დაიმსახურეს, რომ სამუდამო დაივიწყონ. ეს ოთხი არის ყველაზე სუსტი ვილანი, რომლებიც ოდესმე შეგიქმნია და ცოტა ირონიულია, რომ ეს ოთხი „ფანტასტიკური ოთხეულში“ მოხვდა, რომელიც შენი საუკეთესო გამოცემაა. ისიც მართალია, რომ ოთხივე ძალიან მაგარ ამბებში გვხვდებოდა, თუმცა ეს მთლიანად არის სტენ ლის  გასაოცარი წერითი ნიჭის დამსახურება, რომელსაც შეუძლია შექმნას ძლიერი ამბავი სუსტი ვილანებით. გთხოვ, რომ რასაც არ უნდა აპირებდე, ეს ოთხი არ დააბრუნო. ამის ნაცვლად ვისურვებდი, რომ „ფანტასტიკური ოთხეული“ ებრძოდეს შენი სხვა ამბების ისეთ ვილანებს, როგორიცაა Blob, Doc Ock, Sandman და Mandarin. 

ჯორჯ რ. რ. მარტინი

36 E. First St. 

Bayonne, N. J. 07002 “

ახალი „ფანტასტიკური ოთხეულის“ ტრეილერი

ქართველი მაყურებელი მსოფლიო პრემიერამდე ერთი კვირით ადრე (კოინოთეატრების ანონსის მიხედვით) იხილავს „შურისმაძიებლების“ სიქველს - “შურისმაძიებლები: ალტრონის ერას“. რაც შეეხება ახალ „ფანტასტიკურ ოთხეულს“, მისი მსოფლიო პრემიერა 2015 წლის აგვისტოში შედგება.

ავტორი: გიორგი ნაკაშიძე

სრულად

სერ ტერი პრეტჩეტის უკანასკნელი ნოველა სექტემბერში გამოქვეყნდება

ტერი პრეტჩეტის უკანასკნელი ნოველა ,,The Shepherd's Crown" დღის სინათლეს სექტემბერში იხილავს. წიგნი პრეტჩეტის გარდაცვალებამდე რამდენიმე თვით ადრე დასრულდა.

ტომ ველდონი, Penguin Random House გამომცემლობიდან, ამბობს: ,,ჩემთვის დიდი პატივია ტერი პრეტჩეტის უკანასკნელი ნოველის გამოცემა. მისი ნაწარმოებები აღიარებული და დაფასებულია მთელ მსოფლიოში. ჩვენთვის, გამომცემლებისთვის და მკითხველისთვის ეს მოვლენა ძალიან მნიშვნელოვანია!"

წიგნის სიუჟეტი ვითარდება ტერის ფანებისთვის ცნობილ სამყაროში, რომელსაც Discworld ეწოდება. ეს სამყარო ჯერ კიდევ 1983 წლის ნოველაში The Colour Of Magic-ში გვხდება. Discworld გახლავთ გამოგონილი პლანეტა, რომელსაც დისკოს ფორმა აქვს და ოთხი სპილოს ზურგზეა მოთავსებული.

შეგახსნებეთ, რომ ტერი პრეტჩეტი 2015 წლის 12 მარტს გარდაიცვალა საკუთარ სახლში, ოჯახის წევრებისა და საყვარელი კატის გარემოცვაში. გარდაცვალების შესახებ ცნობა, მისმა ქალიშვილმა დაწერა სოციალურ ქსელ ტვიტერზე ,,AT LAST, SIR TERRY, WE MUST WALK TOGETHER".

მისი სიკვდილის შემდეგ ფანებმა 40 000 ევრო შეაგროვეს, რომელიც მოხუცებულთა თავშესაფარში გადარიცხეს. ამით სიმბოლურად გაგრძელდა ის ქველმოქმედება, რასაც სერ ტერი პრეტჩეტი ცხოვრების ბოლო წლებში ახორციელებდა.

სრულად

სასაკლაო ნომერი 5 და კურტ ვონეგუტი

     

1945 წლის 15 თებერვალს გერმანიის ქალაქი დრეზდენი დაიბომბა ბრიტანელების მიერ. გარდაიცვალა ათასობით ადამიანი და უამრავი ისტორიულ-კულტურული მემკვიდრეობის ძეგლი მიწასთან გასწორდა. ამ დროს კურტ ვონეგუტიც იქ იმყოფებოდა. ის ომის ტყვე გახლდათ და შრომით ბანაკში ამუშავებდნენ. ვონეგუტი და მისი თანამოაზრეები მიწისქვეშა სასაკლაოში ცხოვრობდნენ, რომელსაც ექრვა "Schlachthof Fünf". (სასაკლაო ნომერი 5) სწორედ მიწისქვეშეთმა იხსნა ისინი დამომბის და ცოცხლად დაწვისგან.

დაბომბვის შემდეგ კურტს და სხვა პატიმრებს დაავალეს ცხედრების შეგროვება და დამარხვა. საბოლოოდ, კურტმა გაქცევა მოახერხა და ოჯახსაც გაუგზავნა წერილი, სადაც მოკლედ მოუთხრო თუ რა გადახდა თავს. წერილი შეგიძლიათ აქ წაიკითხოთ

ამ ამბებიდან 5 წლის შემდეგ კურტმა მისი პირველი მოთხრობა გამოაქვეყნა. 25 წლის შემდეგ კი გამოქვეყნდა მისი ერთ-ერთი ყველაზე ცნობილი წიგნი Slaughterhouse-Five, or The Children's Crusade: A Duty-Dance with Death, (სასაკლაო ნომერი 5 ანუ ბავშვთა ჯვაროსნული ლაშქრობა), რომელმაც ნელ-ნელ აღიარება მოიპოვა. ამერიკის სკოლებში ეს წიგნი სასკოლო პროგრამაშიც კი იქნა შეტანილი.

1997 წელს ვონეგუტი სტუმრად ეწვია ფლორიდის სახელმწიფო უნივერსიტეტს, სადაც კონფერენციის თემა სწორედ მეორე მსოლფიო ომი და დრეზდენის ამბები იყო. ქვემოთ არის ამ საუბრიდან 5 წუთიანი მონაკვეთი:

ჩემთვის განსაკუთრებით ეს ფრაზა იყო დასამახსოვრებელი: ,,ვფიქრობ, რომ ნებისმიერი ძლიერი წიგნის მესიჯი გახლავთ ის რომ, ადამიანი მარტო არ არის! კარგი წიგნები ახალგაზრდებს ეხმარებიან თვითგამორკვევაში და აძლევენ რწმენას, რომ მეგობარი ყოველთვის გვერდში ჰყავთ! ,,Hey, I've got a friend somewhere else.”იუთუბზე ბოლომდე არ არის ამ ლექციის ჩანაწერი, სრული ლექცია შეგიძლიათ ნახოთ აქ: 

სრულად

კოსტა რიკის ქვის სფეროები

ქვის ბურთულები მსოფლიოს სხვადასხვა ქვეყანაშია გაბნეულია. არავინ იცის ვინ დაამზადა ან საიადან ჩამოგორდნენ ისინი. მათი შემადგენლობა ვულკანური ლავის მსგავსია. საინტერესოა, რომ სადაც ეს სფეროები მდებარეობს, შორიახლოს არსად არის ვულკანის კერები. მეცნიერები ვარაუდობენ, რომ სფეროების ასაკი დაახლოებით 12 000 წელია. მსგავსი სფეროების ყველაზე დიდი ბუდე - კოსტა რიკა.

სფეროების აღმოჩენა აბსოლიტურად შემთხვევით მოხდა. 1930 წელს ამერიკულმა ხილის კომპანიამ, ბანანის პლანტაციების გაფართოების მიზნით, გაჩეხა ჯუნგლები, რის დროსაც შემთხვევით წააწყდა უზარმაზარ სფეროებს, თითოეულის დიამეტრი სამ მეტრს აღწევდა და დაახლოებით თექვსმეტ ტონას იწონიდა. ამის შემდგომ არქეოლოგებმა და გეოლოგებმა დაიწყეს მსოფლიოს სხვადასხვა კუთხეში მსგავსი სფეროების აღმოჩენა. მათი წარმოშობის შესახებ დღესაც არ არსებობს ერთიანი და ჩამოყალიბებული პოზიცია

ავტორი: ირაკლი სულაძე

სრულად

Marshall Law

2014 წლის 1 დეკემბერს აშშ-ს უზენაესმა სასამართლომ მიიღო განიხილა საქმე Elonis v. United States (ელონისი შეერთებული შტატების წინააღმდეგ). საქმე ეხებოდა 31 წლის პენსილვანიელ ანტონის ელონისს, რომელსაც 2011 წელს ბრალი დასდეს ფეისბუქის გვერდზე აწ უკვე გაშორებული ცოლის წინააღმდეგ  გაკეთებული განცხადებების გამო.

ფეისბუქის გვერდზე ცოლისადმი მიძღვნილმა სტატუსმა „There's one way to love you but a thousand ways to kill you“ ანტონისს 44-თვიანი თავისუფლების აღკვეთა მოუტანა შედეგად. დაცვის მხარე ამტკიცებდა, რომ ეს ფრაზა განხილული უნდა ყოფილიყო თანამედროვე რეპის ლირიკების კონტექსტში. 1 დეკემბერს უზენაეს სასამართლოს მოუწია მოესმინა მოხსენება ჰიპ-ჰოპის ისტორიასა და კომუნიკაციების თანამედროვე მეთოდების შესახებ.

ამ მოხსენების მიზანი იყო, რომ ფრაზა წარმოადგენდა სათქმელის ჰიპერბოლურად გამოხატვის საშუალების ისეთივე მეთოდს, როგორსაც ვხვდებით  თანამედროვე რეპის რეჩიტატივებში (მუქარის ტექსტები განსაკუთრებით ხშირია დაპირისპირებულ რეპერებს შორის). შესაბამისად აქცენტი გაკეთდა იმაზე, რომ ყურადღება უნდა მიექცეს ტექსტის დამწერის ნამდვილ განზრახვასა და კონექსტს და არა ამ ტექსტის მკითხველისეულ ინტერპრეტაციას. დაცვის მხარის არგუმენტი შეიცავდა ფრაზებს ემინემის 1998 წლის ნამუშევრიდან '97 Bonnie & Clyde, რომელშიც უხვადაა მინიშნებები Slim Shady-ის მოკლულ ცოლზე: 

• `Da-da made a nice bed for mommy at the bottom of the lake`
• `Here, you wanna help da-da tie a rope around this rock?`
• `There goes mama, spwashin in the wa-ta/No more fightin wit dad, no more restraining order`

ბრალდების მხარის არგუმენტზე, რომ ემინემი იყო რეპერი და ასეთი ტექსტების ტირაჟირება მისთვის პროფესიულ საქმიანობას წარმოადგენდა, დაცვის მხარემ უპასუხა,. რომ ბრალდებული უკვე დიდი ხანია უსმენდა რეპს და სულაც არ იყო გასაკვირი მის მიერ ასეთი შინაარსის ტექსტების გამოყენება თავისი სათქმელის მისსავე საყვარელ სტილში გამოსახატავად.

კომენტარი: მიუხედავად ამ საქმის არსისა, რომელიც უფრო იურისტებს დააინტერესებს, ამ პოსტში მინდოდა მეჩვენებინა, რომ რეპი არ არის მხოლოდ სიტყვების რახარუხი და ის, რომ აშშ-ს უმაღლესი სასამართლო ორგანო საქმის განხილვისას იყენებს ზოგადად რეპს და უფრო კონკრეტულად კი ემინემის შემოქმედებას,  კიდევ უფრო წარმოაჩენს ამ ჟანრის ღირებულებას.

ერთ-ერთმა მომხარებელმა ამ ნიუსზე დააკომენტარა, რომ Supreme Courts + Eminem = Marshall Law, (ემინემის ნამდვილი სახელია Marshall, ხოლო Martial (გამოითქმის როგორც „მარშალ“) Law ნიშნავს საგანგებო მდგომარეობას, რომელსაც სახელმწიფო მაშინ აცხადებს, როდესაც მას საფრთხე ემუქრება. ყველაზე მაგარი კომენტარია, რაც წამიკითხავს).


ავტორი:  გიორგი ნაკაშიძე (იურისტი და ემინემის მიმდევარი).

სრულად

გალერეა: ანიმე არტი ქართველი თინეიჯერისგან

 ფოტოები მოგვაწოდა ტონერი ოცუცკიმ.

სრულად