DC Extended Universe-ის კინემატოგრაფია

The DC Extended Universe (DCEU) წარმოადგენს ამერიკულ მედია ფრენჩაიზს და ფიქციურ სამყაროს, რომელიც ორიენტირებულია DC-ის სუპერგმირების როგორც სოლო, ასევე - ქროსოვერ ფილმებზე. ფრენჩაიზის პროდიუსერია Warner Bros. Pictures. ამ პროექტის ფარგლებში პირველი ფილმი იყო 2013 წლის Man of Steel. გარდა ამისა, პროექტის ფარგლებში ვიხილავთ შემდეგ ფილმებს:

Batman v Superman: Dawn of Justice

25 მარტს, გოთემელი ბეტმენი, იმის შიშით, რომ სუპერმენის უკონტროლობამ შეიძლება მძიმე შედეგები გამოიწვიოს, სტუმრობს მეტროპლისს, რათა ამ უკანასკნელს „დაელაპარაკოს“, ამასობაში კი სცენაზე შემოდის მესამე მხარე ლექს ლუთორისა და დუმსდეის სახით.თავდაპირველად, ფილმი დაანონსდა San Diego Comic-Con International-ზე, Man of Steel-ის გამოსვლის შემდეგ. 2013 წლის ივნისში ზაკ სნაიდერმა და დევიდ გოიერმა დაიწყეს პროექტზე მუშაობა. Batman v Superman: Dawn of Justice იქნება Man of Steel-ის გაგრძელება და ბეტმენის ფრენჩაიზის რებუთი,ასევე, პირველი ლაივ-ექშენი, რომელშიც ერთად გამოჩნდება ბეტმენი, სუპერმენი, ვანდერ ვუმენი, აქვამენი, ფლეში და საიბორგი.

Suicide Squad

5 აგვისტოს თვითმკვლელთა რაზმს - პატიმრობაში მყოფი ცუდი ბიჭები და გოგონების ჯგუფს, შეწყალების სანაცვლოდ, საიდუმლო სახელმწიფო უწყებააგზავნის სახიფათო მისიაზე. ფილმში გამოჩნდებიან ისეთი ვილანები, როგორებიცაა Deadshot, Diablo, Rick Flag, Boomerang, Killer Croc, Slipknot, Enchantress, და წყვილი, რომელსაც ყველაზე მეტად ელოდება მაყურებელი, Joker და Harley Quinn. 

Wonder Woman

2017 წლის 23 ივნისს ეკრანებზე ვიხილავთ ამაზონის პრინცესას, უკვდავ, ნახევრად ქალღმერთს და ზევსის ქალიშვილს -ვანდერ ვუმენს. როგორც ჯეფ ჯონსმა, DC-ის წარმომადგენელმა განაცხადა, ის „საუკეთესო მებრძოლია“ DC-ის სამყაროში და იმსახურებს სოლო ფილმს. ფილმის ძირითადი გადაღებები დაიწყო 2015 წლის ნოემბერში. 

Justice League - Part 1

2017 წლის 17 ნოემბერს, საბოლოოდ ვიხილავთ DC-ის ერთ მხარეს მდგომ სუპერგმირებს.

The Flash

ლაბორატორიაში მუშაობისას ელვის დარტყმის შედეგად მსოფლიოში უსწრაფესი ადამიანის სოლო ფილმის პრემიერა 2018 წლის 23 მარტს შედგება. ფლეშს ითამაშებს მსახიობი ერზა მილერი.

Aquaman

2018 წლის 27 ივლისს დიდ ეკრანებზე ვიხილავთ ჯეისონ მომოას მიერ განსახიერებულ არტურ კარს - ნახევრად ადამიანს, ნახევრად ღმერთს და ზღვის სამყაროსთან მოლაპარკე აქვამენს.

Shazam

ბილი თინეიჯერია, რომელიც სუპერძალებს მომაკვდავი ჯადოქრისგან მიიღებს. როცა ის წარმოთქვამს სიტყვას „შაზამ“, მაშინ 2019 წლის 5 აპრილს კინოთეატრებში ბილი მოგვევლინება სუპერგმირად. მისი მოწინააღმდეგე კი დუეინ ჯონსონის მიერ გაცოცხლებული შავი ადამი იქნება

Justice Leagure - Part II

Warner Bros ერთ „სამართლიანობის ლიგაზე“ ვერ ჩერდება და 2019 წლის 14 ივნისს მეორე ნაწილით ბრუნდება.

Cyborg

მსახიობი რეი ფიშერი ითამაშებს სპორტსმენ ვიქტორ სტოუნის როლს, რომელიც უბედური შემთხვევის წყალობით, ახალ... კიბორგულ სხეულში ამოყოფს თავს. საიბორგის რისხვას კი კინოთეატრებში 2020 წლის 3 აპრილს ვიხილავთ.

Green Lantern Corps

მწვანე ლამპარი უერთდება გალაქტიკური მართლწესრიგის დამცველთა ორდენს, რომელმაც ის მაგიური ბეჭდით დააჯილდოვა. მწვანე პოსტერებით აჭრელებულ კინოთეატრებს კი 2020 წლის 19 ივნისს უნდა ველოდოთ.

The Batman

პრემიერის ზუსტი თარიღი უცნობია, თუმცაშავი რაინდის აღზევებას კვლავ ვიხილავთ 2020 წლის ზაფხულის შემდეგ.

ავტორი: გიორგი ნაკაშიძე

სრულად

გალერეა: Marvel Comics-ის ოქტომბრის თვის ნომრები და ქოსპლეის კოსტუმები

მარველმა საჯარო გახადა ოქტომბრის ნომრების სავარაუდო გარეკნები, რომლებზეც გამოსახული იქნება მარველის ქოსპლეების საუკეთესო კოსტუმები. „როცა ქოსპლეებზე დავდივარ, უფრო და უფრო მეტი ადამიანი მხვდება მარველის თავიანთი საყვარელი გმირის კოსტუმებში“ - ამბობს მარველის მარკეტინგისა და გაყიდვების ვიცე-პრეზიდენტი დევიდ გებრიელი. „სახლში დამზადებული და ხელით გაკეთებული ეს კოსტუმები იმდენად ზუსტია, რომ პირდაპირ კომიქსის გვერდებიდან გადმოტანილი გეგონება. ეს ინიციატივა საშუალებას მოგვცემს, წავახალისოთ ის საზოგადოება, რომელიც ჩვენ მხარს გვიჭერს“.

  

ავტორი: გიორგი ნაკაშიძე

სრულად

არტ შპიგელმანის ომგამოვლილი თაგვი

"როდესაც რამდენიმე დღით ერთ ოთახში ჩაგკეტავენ მშივრებს, იქ სიტყვა "მეგობარი" აღარ არსებობს."

კომიქსს - ქართულ თარგმანში გრაფიკულ ნოველად, ან გრაფიკულ რომანად მოვიხსენიებთ, თუმცა ძალიან ცოტაა "სარომანე" კომიქსები. ამ მხრივ ერთ-ერთი უდავოდ გამორჩეულია ამერიკელი ავტორის - არტ შპიგელმანის 296 გვერდიანი, შავ-თეთრ ნახატებში შესრულებული, თითქმის მინიმალიზმამდე დაყვანილი გრაფიკული რომანი - "თაგვი" (Maus), რომელიც დასრულებული სახით პირველად 1991 წელს გამოიცა და გახდა პირველი კომიქსი, რომელმაც პულიცერის პრემია მოიპოვა. პრემიის არ ვიცი, მაგრამ მისმა პერსონაჟებმა და უაღრესაც დაინტერესო სიუჟეტმა მსოფლიოს მილიონობით მკითხველი ნამდვილად დააინტერესა, მიუხედავად იმისა, რომ კომიქსის მთავარი თემა ცოტა გაცვეთილი ჰოლოკოსტია. 

კომიქსის კითხვის დაწყებისთანავე თვალში გხვდება მარტივი ნახატები, ადამიანთა ნაცვლად გამოყვანილი ცხოველები, რომლებიც ეროვნების მიხედვით განირჩევა და საკმაოდ მსუყე ტექსტი, რომელიც რამდენიმე სხვადასხვა ამბავს მოგვითხრობს. თავიდანვე, იქმნება შთაბეჭდილება, თითქოს მხატვარმა სქელი შავი ფანქარი აიღო და რომანის დასურათება ერთი ხელის მოსმით შეძლო, ისე, რომ ესკიზებიც კი არ შეუქმნია. მთავარი მოქმედი პერსონაჟები თავად ავტორი და მისი მამა არიან. არ ვიცი, რამდენად სანდოა რეალობის კომიქსისეული აღწერა, თუმცა წიგნის დიდი ნაწილი ბიოგრაფიული ხასიათისაა. ახალდაოჯახებული, წარმატებული არტი ჩადის მამასთან, რომელიც მეორე ცოლთან ერთად ცხოვრობს და ცდილობს მისგან მოსმენილი ამბებით ახალი ნაწარმოები შექმნას. ნაწარმოები, რომელიც გრაფიკულად იქნება გაფორმებული და ზედმიწევნით ზუსტად მოყვება ერთი იღბლიანი ებრაელის ამბავს.

მთავარი ებრაელი - არტის მამა, უფროსი შპიგელმანია, რომელიც სხვა მისი თანამემამულეების მსგავსად თაგვის სახითაა წარმოდგენილი. აქვე არიან ძაღლი - ამერიკელები, (თუმცა "ძაღლი" ცოტა უხეშად ჟღერს, რადგან იანკები კომიქსში საკმაოდ დადებითი კუთხით არიან წარმოჩენილი. მათი შექმნისას, ალბათ, შპიგელმანი მცირედით თავის კარიერაზეც ფიქრობდა.) ღორი - პოლონელები (არაებრალი პოლონელები), კატა - გერმანელები, ირემი - შვედები და ა.შ.  რომანი რამდენიმე თავადაა დაყოფილი, რომლებიც ნელ-ნელა ამძაფრებს სიუჟეტს და საბოლოოდ ლოგიკურ დასასრულამდეც მიდის. საწყის თავებში ძალიან ახლოს ვეცნობით შპიგელმანების ოჯახს, მათ ომისწინანდელ მდგომარეობას და რაც მთავარია, ებრაელებთან დაკავშირებულ მსოფლიოში გავრცელებული სტერეოტიპების დამდასტურებელ უამრავ ფაქტს.

ძალიან საინტერესო პერსონაჟია უფროსი შპიგელმანი - ვლადეკი. შეუძლებელია, მისი ერთგვაროვნად დახასიათება. თითქოს, ტანჯული, მძიმე წარსულის მქონე "თაგვია", თუმცა, მეორე მხრივ, მისი ახლანდელი ხუშტურები არც მთლად მოსაწონი და ძნელადაც გასამართლებელია. იმ ომშიც, თავისი მოხერხებულობის და ჭკუის წყალობით ბევრ მომენტში "გამოძვრა", რამაც საბოლოოდ გადაარჩინა კიდეც. ვლადეკის პერსონაჟი, მიუხედავად ძალიან საინტერესო ხასიათისა, ალბათ მცირედ ჩრდილს სცხებს მთლიან რომანს, იმ მხრივ, რომ ის არ არის უბრალო, გაჭირვებული ტყვე, რომელმაც სულ მთლად ბედის ირონიით მოახერხა სამშვიდობოს გასვლა. ვლადეკი მუდამ კარგად გამოიმუშავებდა და საგულდაგულოდ შენახული ძვირფასეულობაც არაერთხელ დაეხმარა მძიმე წუთების გადატანაში. თუმცა, სიმართლე უნდა ითქვას, - მეგობარი და კეთილი საქმის გამკეთებელი არასდროს დავიწყებია და ყველას სათანადოდ აჯილდოვებდა, მიუხედავად იმისა, ისინი კატები იყვნენ, ღორები თუ თაგვები.

რა განასხვავებს "თაგვს" მეორე მსოფლიო ომის და ჰოლოკოსტის შესახებ დაწერილი ისტორიებისგან? გარდა იმისა, რომ ისტორიის გრაფიკულმა გადაწყვეტამ მონათხრობის სიმძაფრე, თითქოს, ერთი შეხედვით, შეამცირა, ბოლო გვერდამდე არ გტოვებს მოუსვენრობის გრძნობა და მიუხედავად იმისა, რომ მისი გმირები შესაძლოა შენთვის საყვარელი და ახლობელი არსებები არ გახდნენ, მათდამი თანაგრძნობა იმდენად დიდია, რომ უკანასკნელმა წინადადებამ და ნახატმა შეიძლება ცრემლიც ვერ შეგაკავებინოს.

გარდა ამისა, შპიგელმანის მთავარი პლუსი მაინც ის მგონია, რომ მიუხედავად უთანასწორო ბრძოლისა, ამ ამბის ყველა პერსონაჟი თანაბრად "გათხვარა" და არც ერთი ცოცხლად დარჩენილი გმირი არ წარმოუჩენია განტევების ვაცად. "თაგვში" ერთდროულად, ძალიან ბევრი და ძალიან ცოტა "მსხვერპლია". თავად ავტორიც კი, (არ ვიცი, განზრახ, თუ ავტორისეული პატიოსნებით) რიგ მომენტებში გამაღიზიანებელ შთაბეჭდილებას ტოვებს და ამით ბოლო გვერდებზე შემცირებული "კატების" სურათებიც კი შეიძლება მოგანატროთ.

დაბოლოს, ღირს კი, ჩვენი დროის, თვალების და წარმოსახვის უნარის "თაგვების ისტორიაზე" დახარჯვა? - დიახ! უდავოდ, ღირს. რადგან, არტი არის ძალიან ძალიან საინტერესო მთხრობელი და მას ვლადეკის (რომელიც სალფეთქსაც კი არ ყიდულობს, ზედმეტი ფინანსები რომ არ დახარჯოს და ქუჩაში დაგდებულ ელექტრო-სადენებს ზიდავს შინ, - რაიმეში ოდესმე გამომადგებაო) სახით ჰყავს ძალიან ძალიან მსუყე წყარო, რომლის ისტორიაც თავისი შინაარსით განსხვავდება ყველა აქამდე მოსმენილი/ნანახი ამბისგან. არ ვიცი, რამდენად იმსახურებს "თაგვი" ლიტერატურულ პრემიებს, მაგრამ ის ნამდვილად იმსახურებს მსოფლიოს მკითხველთა დიდ ინტერესს, რადგან აქ მოთხრობილი ამბები იმავე წარმატებით შეიძლება მოვყვეთ ჩვენსავე თავებზე - ძროხებზე, დათვებზე, კურდღლებზე, ჭიანჭველებზე...

ავტორი: ირაკლი სულაძე

სრულად

The Escapists - ექვს ნომერში ჩატეული დიდი ისტორია

წელი: 2006
ავტორები: ბრაიან ვოიგენი, მაიკლ შეიბონი

ჟანრი: კრიმინალური, მოქმედებითი, სათავგადასავალო
გამომცემლობა: Dark Horse
ნომრების რაოდენობა: 6

ერთხელ, მკითხველებთან შეხვედრისას, ერთ-ერთმა დამსწრე ახალგაზრდამ ურსულა ლე გუინს ჰკითხა, დამწყები მწერალი ვარ, მაგრამ ვერავის მივაწვინე ჩემი ხმა და ხომ ვერ მირჩევთ, აგენტი როგორ მოვხიბლოო. მაშინ ლე გუინმა ახალგაზრდას ზუსტი პასუხი ვერ გასცა, რადგან პრინციპში ზუსტი პასუხის გაცემა შეუძლებელიც იყო. მარკეტინგი და "პი არი", სხვა ბოროტ ტერმინებთან ერთად, ის ორი ცუდი ბიძიაა, ხელოვანთა დიდ ნაწილს რომ დღემდე ხელს უშლის. თითქოს პირიქით, უნდა ეხმარებოდეს, თუმცა მათი არასწორად, ან სულაც არ გამოყენებას ბევრი ავტორი არარეალიზებისკენ მიჰყავს.

ჩვენ ყოველდღიურად ვკითხულობთ კომიქსებს, ვეცნობით მათ ავტორებს, გონებამახვილურ დიალოგებს, თვალწარმტაც მხატვრობას და უბრალოდ, ძალიან საინტერესო სიუჟეტებს, თუმცა ხშირად ყურადღების მიღმა რჩება ის ხალხი, ვისაც პროდუქტი ჩვენამდე მოაქვს და უმეტესობამ არც კი ვიცით, როგორ ხდება ერთი შეხედვით სულელური და ბავშვური გმირების მსოფლიო დონის ვარსკვლავებად ქცევა. 

Escapist  - არის ისტორია ახალგაზრდა ებრაელი ბიჭის შესახებ. მას ძალიან უყვარს კომიქსები და ძალიან უყვარს თავისი ოჯახი, რომელსაც სამწუხაროდ მალევე კარგავს და მისგან მხოლოდ ორი რამ რჩება: მამისგან - კომიქსებისა და მასთან დაკავშირებული ატრიბუტიკის უზარმაზარი კოლექცია, დედისგან კი - გარდაცვალების სანაცვლო სადაზღვეო თანხა. ყმაწვილი მთლიანად მამის საყვარელ პერსონაჟ Escapist-ში ეფლობა და ცხოვრებას ერთადერთი მიზნით აგრძელებს: მკვდრეთით აღადგინოს ხალხში მივიწყებული სუპერ-გმირი და ამით მამის ხსოვნას პატივი სცეს. ის მშობლების დანატოვარი თანხით ადვილად შეძლებს ობმოდებულ გმირზე საავტორო უფლების მოპოვებას და თავის ორ მეგობართან ერთად იწყებს იმ დიდ საქმეს, რასაც კომიქსის შექმნა ჰქვია.

თხრობა ორ პარალელურ სივრცეში მიმდინარეობს. ერთი - რეალური, მთავარი გმირების ყოველდღიური დაუღალავი შრომა და გამუდმებით იმის ცდა, რომ როგორმე შეაღწიონ ამ უზარმაზარ ბაზარზე და თავიანთი სიტყვა თქვან, მეორე მხრივ კი ის Escapist, რომელსაც ისინი ქმნიან. ამ უკანასკნელის მხატვრობა ბევრად აღემატება რეალურ მოქმედებებს, რაც პრინციპში ავტორების სათქმელს კიდევ უფრო კარგად უსვამს ხაზს. კომიქსის გმირები ჩვეულებრივი გამოუცდელი ახალგაზრდები არიან, რომლებიც დატვირთული არიან იდეებით, რომელთა განხორციელებისთვისაც საკმარისი არც სახსრები აქვთ და არც გავლენა.

მიუხედავად იმისა, რომ კომიქსი ექვს ნომერშია ჩატეული, მასში ყველაფერია: ტრაგედია, კომედია, იმედგაცრუება, სიყვარული, აღელვება, საზოგადოებრივი ჩაგვრა და რეკეტიც კი. მოკლედ რომ ვთქვათ, Escapist ზედგამოჭრილია მათთვის, ვინც საზოგადოებაში თავისი ადგილით არც თუ მთლად კმაყოფილია. ერთ-ერთი ყველაზე საინტერესო სცენა ვითარდება დიდ კორპორაციაში, რომელშიც კომიქსის ერთ-ერთი მთავარი გმირი ბლოკნოტში სუპერგმირის ჩანახატებს აკეთებს, ამასობაში მისი კოლეგა ხუმრობით აღნიშნავს, რომ უმჯობესია ფანჯარაში გაიხედოს და ის სივრცე დახატოს, რასაც იქ ხედავს, ვიდრე დრო კუბიკებში ჩახატული ფიგურების შექმნაში დახარჯოს. ამასობაში კადრი იცვლება და ზედხედით ჩანს კორპორაციის უზარმაზარი ოთახი, რომელიც ტიხრებით პატარ-პატარა კუბიკის მსგავს განყოფილებებადაა დაყოფილი.

რა თქმა უნდა, შინაარსი ვერ დგას მოწოდების სიმაღლეზე, არც მოულოდნელი მოქმედებებით გამოირჩევა და არც პერსონაჟების მრავალფეროვნებით, სიუჟეტის ბანალურობაც რამდენიმე ადგილზე შემაწუხებელია, თუმცა, საერთო ჯამში, ეს ყველაფერი ტოვებს შთაბეჭდილებას, რომ ეს გრაფიკული რომანიც ისეთივე ახალგაზრდის შექმნილია, როგორიც მისი მთავარი გმირია. კომიქსი არ ადგენს მაღალ თამასას საკუთარი თავის მიმართ და არც იმის პრეტენზია აქვს, რომ სხვა ბუმბერაზების გვერდით იდგეს, თუმცა მისი ხიბლიც ამაშია. ეს ექვსი ნომერი არის საკმარისზე მეტი საიმისოდ, რომ კარგად დავინახოთ ხელოვნების ამ კონკრეტულ დარგში მოღვაწე ახალგაზრდების (და არა მარტო) მისწრაფებები და სულისკვეთება. ყველაფრის მიუხედავად, უსამართლობა იქნება არ აღინიშნოს, რომ დასკვნითი სცენა ყოველგვარ მოლოდინს აჭარბებს და ისეთი ემოციით გვავსებს, რომ ერთიანად გული გვწყდება, რადგან ისტორია მთავრდება. გვსურს, ჩვენც გვქონდეს Escapist-ის უნარი და უნივერსალური გასაღები, რომ ამ ამბის ბოლოში მდგარი კარი შევაღოთ და გმირების შემდგომი ამბებიც ჩვენ წინ გადაიშალოს.

კომიქსის ლინკი

ავტორი: ირაკლი სულაძე

სრულად

20 უცნობი (საინტერესო) ფაქტი ბეტმენის შესახებ

1. თურქეთში მდებარეობს ქალაქი, სახელწოდებით „ბეტმენი“. უცნობია, აქვს თუ არა ბეტმენს ამ ადგილებში უძრავი ქონება, თუმცა ადგილი მართლაც ლამაზია.

2. 90-იან წლებში ბეტმენი ებრძოდა ებოლას. ეპიდემიას კინაღამ ემსხვერპლა რობინი. სუპერგმირებსაც კი ჭირდებათ ჰიგიენის დაცვა.

3. სიტყვა „ბეტმენი“ გამოიყენება ვინმეს პირადი მსახურის აღსანიშნავად. გამოდის, რომ ალფრედ პენივორთი არის ბეტმენის ბეტმენის. თუ ალფრედს ეყოლებოდა თავისი მსახური, ის იქნებოდა ბეტმენის ბეტმენის ბეტმენი და ა.შ.

4. ბენ აფლეკი არის ერთდაერთი მსახიობი, რომელმაც მოირგო როგორც ბეტმენის, ისე - სუპერმენის კოსტუმები ორ სხვადასხვა ფილმში (აქ საუბარია ფილმ Hollywoodland-ზე, სადაც იძიებენ სატელევიზიო შოუს სუპერმენის - ტომ რივზის იდუმალებით მოცულ სიკვდილს).

5. 1996 წელს, DC-მ და მარველმა გამოუშვეს ქროსოვერ-კომიქსების სერია, სადაც ბეტმენი და სამურავი იქცნენ ერთ პერსონაჟად, სახელად Dark Claw (იხ. სურათი).

6. ტომ ჰარდს ბეინის როლის თამაშისას დაჭირდა სამ დუიმიანი ქუსლები, რათა გამხდარიყო კრისტიან ბეილის სიმაღლე და მისთვის „თვალებში ჩაეხედა“.

7. პოლ რუბენსმა 1992 წლის Batman Returns-ში ითამაშა პინგვინის მამის როლი.

8. ერთ დროს „ბეტმენი“ ერქვა ერთ-ერთ სამხედრო დგომას (პოზიციას).

9. კვენტინ ტარანტინოს გულზე არ ეხატება ბეტმენი, რადგან, მისი აზრით, „ბეტმენი არ არის საინტერესო პერსონაჟი.“ ტარანტინოს აზრით, ბეტმენს საუკეთესოდ ითამაშებდა ალეკ ბოლდუინი 80-იან წლებში.

10. არსებობს 1967 წლის (აწ უკვე დაკარგული) ფილიპინური ფილმი Batman Fights Dracula, რომელშიც ბეტმენი ებრძვის დრაკულას. ფილმი წარმოადგენს ბეტმენისა და ჰორორის ნაზავს კომედიური ელემენტებით.

11. ბეტმენი იმდენად ჯობნის რიდლერს გონებრივად, რომ ეს იწვევს რიდლერის სიგიჟეს. ერთხელ რიდლერმა ბეტმენისთვის მოაწყო „სრულყოფილი მახე“, თუმცა ბეტმენი გაიქცა. შოკმა და ცნობისმოყვარეობამ იმდენად იმოქმედა რიდლერის მენტალურ ჯანმრთელობაზე, რომ Arkham Asylum-ში უკრეს თავი.

12. ბეტმენის შექმნის შთაგონების წყაროა ლეონარდო და ვინჩი, ფილმები და ნიღბიანი ადამიანები - ფრთები აიღეს და ვინჩის მიერ დახატული საფრენი მოწყობილობიდან; კოსტუმისა და პიროვნების ინსპირაცია მოვიდა 1930 წლის ფილმიდან Bat Whisperers, მდიდარ ალტერ-ეგოს საფუძვლად დაედო 1920 წლის ფილმი The Mask of Zorro, რადიო პროგრამის პერსონაჟმა კი, სახელად შედოუმ, საბოლოო სახე მისცა ბეტმენის ვიზუალს, ორმაგ ვინაობას და ინტელექტუალურ შესაძლებლობებს.

13. ბეტმენის საიდუმლო ვინაობა არც თუ ისე „საიდუმლოა“. რეალურად 11-მა პერსონაჟმა იცის (ან იცოდნენ), რომ ბეტმენი და ბრიუს უეინი ერთი და იგივე ადამიანია.

14. ბეტმენი მუდმივად 34 წლისაა - თუმცა აქვს მდიდარი CV: განათლება კემბრიჯსა და სორბონაში, FBI-ში მუშაობის გამოცდილება, საბრძოლო ხელოვნების ტრენინგები აზიაში, ნამდვილი ნინძებიდან მიღებული ცოდნა და ა.შ.

15. The Dark Knight არის პირველი ფილმი, რომლის სახელწოდებაში არ გვხვდება სიტყვა „ბეტმენი“. აღნიშნული მიდგომა შეინარჩუნა კრისტოფერ ნოლანმა The Dark Knight Rises-ის გადაღებებისას.

16. Batman: The Animated Series-ში ჯოკერის ხმა არის ლუკ სკაივოლკერის ხმა (გალაქტიკის უკანასკნელი ჯედაი გადადის „ბნელ მხარეზე“).

17. ისტორიაში ბეტმენის პირველი ფილმის რეჟისორი იყო ენდი უორჰოლი (პოპ-არტის ფუძემდებელი). მან 1964 წელს, DC-ის ნებართვის გარეშე გადაიღო შავ-თეთრი ფილმი Batman Dracula, რომელმაც ვერასდროს იხილა დღის სინათლე. 

18. გოთემი არის რეალური ქალაქი ნოტინგჰემში.

19. ბეტმენის სამყაროში არსებობს „ბითლზების“ ვერსია. 

20. რობინი მოკლეს ფანებმა -1988 წელს ჩატარდა გამოკითხვა რობინის ამბის დასასრულის შესახებ. 10, 000 გამოკითხულიდან 5343-მა მოითხოვა მისი სიკვდილი, რობინიც მოკლეს. 

წყარო: BestPictureBlog

ავტორი: გიორგი ნაკაშიძე

სრულად